Bandaríska sjónvarpsfréttakonan Christiane Amanpour, einn kunnasti fréttamaður sjónvarpsstöðvarinnar CNN, er að færa sig um set og hefur ráðið sig hjá ABC sjónvarpsstöðinni. Mun hún stýra fréttaþætinum This Week á sunnudagsmorgnum og starfa við aðra fréttaþætti.

Amanpour tekur við starfinu af George Stephanopoulos, fyrrum aðstoðarmanni Bills Clintons, fyrrverandi Bandaríkjaforseta, en hann mun stýra morgunþætti ABC, Good Morning America.

Amanpour, sem er 52 ára, varð þekkt þegar hún flutti fréttir af Persaflóastríðinu árið 1991, sem hófst eftir að Írakar réðust inn í Kúveit. Hún hefur tekið viðtöl við marga þjóðarleiðtoga og áhrifamenn á undanförnum tveimur áratugum og sagt fréttir af átakasvæðum á borð við Írak, Afganistan, Pakistan, Sómalíu, Rúanda og Balkanskaganum.