Joslyn James.

Ein kvennanna, sem segist hafa átt vingott við bandaríska kylfinginn Tiger Woods á síðustu árum, birti í dag texta SMS skeyta sem hún segist hafa fengið frá ástmanni sínum.

Woods tilkynnti í vikunni að hann ætlaði að hefja keppni á ný í apríl eftir nokkurra mánaða hlé sem hann tók sér vegna hneykslismála sem blossuðu upp í nóvember. Textarnir, sem klámstjarnan fyrrverandi Joslyn James birti á heimasíðu sinni í dag benda til þess, að öldurnar séu ekki að lægja.

Nokkrir textanna virðast sýna hvernig Woods skipulagi ástarfundi með James. Í einum segist hann ætla að skilja eftir umslag á hóteli merkt ungfrú Daniels. „Þú verður í 305. Komdu þér fyrir og láttu mig vita þegar þú getur tekið á móti mér. Ég verð í herbergi 201."

James segist hafa átt í ástarsambandi við Woods í þrjú ár.