Frönsk heimildarmynd sýnir að þeir sem taka þátt í raunveruleikaþáttum í sjónvarpi víla ekki fyrir sér að gefa þátttakendum raflost jafnvel þó fólk æpi vegna sársauka.

Í myndinni var fólki boðið að taka þátt í spurningaleik í sjónvarpsþætti sem m.a. gekk út á að refsa þátttakendum með því að gefa þeim raflost. Leikurinn kallaðist Game of Death. Um 82% þátttakenda var tilbúnir að gefa keppinautum sínum raflost. Þeir sem tóku þátt í leiknum vissu ekki að mótspilarar þeirra voru leikarar og að ekkert raflost var gefið.

Þeir sem gerðu myndina segjast með þessari tilraun vilja sýna fólki fram á hvað raunveruleika-sjónvarp geti verið varasamt. Í slíkum sjónvarpsþáttum sé hægt að fá fólk til að gera hluti sem gangi þvert á öll siðferðileg mörk.

Þessi tilraun er sambærileg við tilraun sem Yale-háskóli gerði fyrir tæplega hálfri öld. Þá voru 62% þátttakenda tilbúnir til að gefa raflost og héldu því áfram þrátt fyrir að heyra kvalaóp úr herberginu við hliðina á. Í frönsku tilrauninni voru yfir 80% tilbúnir til að gefa raflost.