Heimildarmynd Páls Steingrímssonar um kríuna, Krían: Þrisvar til tunglsins og til baka aftur, verður frumsýnd í Háskólabíói kl. 17:00 í dag, en heiti myndarinnar vísar í þá vegalengd sem krían flýgur á hverju ári þegar hún heldur frá norðurslóðum til suðurskautsins til að hafa þar vetursetu.

Páll elti kríuna meðal annars til suðurhvelsins um jólin í fyrra, aukinheldur sem hann kvikmyndaði kríu víða um land; á Reykjanesi, á Snæfellsnesi, Barðaströnd, Látrum, Melrakkasléttu og Þingvallavatni.

Páll segir að við komuna suðureftir hafi hann séð glöggt hvað það er mikilvægt fyrir kríuna að geta nýtt sér tvö sumur. "Hún þarf tuttugu klukkustunda birtu til að þrífast, hún þarf að vera á veiðislóð í björtu og er alltaf að," segir Páll, en hann byrjar myndina á ferðalaginu norður til Íslands og endar hana á fluginu suður á bóginn að nýju.

Páll segir að í sjálfu sér hafi fátt komið honum á óvart þegar hann var að vinna myndina, en það þó sem hann nefnir að hún sé að sækja í birtuna þar fyrir sunnan og svo hitt hvað krían er viðkvæm fyrir því þegar átuskilyrði breytast. "Síðustu þrjú ár í röð hefur verið katastrófa í afkomu unganna allstaðar hér við land nema helst fyrir Norðurlandi og á hluta Vestfjarða. Það er svo margt sem spilar saman og til dæmis skiptir máli hvað sílin eru stór þegar ungarnir eru að komast á legg, því ef þau eru of stór kemur unginn þeim ekki niður. Annað sem ég vissi ekki var það hvað krían er fim að veiða flugur á flugi og eins það að hún tæki maðka í túnum, það vissi ég ekki fyrr en ég fór að horfa á það."