Keira Knightley og James McAvoy í hlutverkum sínum í myndinni Friðþægingu.

Enski rithöfundurinn Ian McEan vinnur nú að gerð óperu eftir skáldsögu sinni Atonement, eða Friðþægingu eins og bókin heitir í íslenskri þýðingu. Kvikmynd var gerð eftir bókinni fyrir nokkrum árum með Keiru Knightley og James McAvoy í aðalhlutverkum.

McEwan segist í viðtali við breska blaðið The Times vera að vinna að óperunni í samstarfi við tónskáldið Michael Berkeley og ljóðskáldið Craig Raine. Segist McEwen vilja að þetta verði mikilfengleg ópera. „Það er að minnsta kosti ljóst, að þetta verður engin kammertónlist," segir hann.

Friðþæging fjallar um atburði á ensku sveitasetri á millistríðsárunum sem hafa áhrif á líf ungs fólks. Bókin kom fyrst út árið 2001 og var tilnefnd til bresku Booker verðlaunanna. Kvikmyndin, sem var frumsýnd árið 2007, var tilnefnd til 7 Óskarsverðlauna en vann ein, fyrir tónlist.  

The Times segir, að óperuhús á Englandi, í Þýskalandi og Bandaríkjunum eigi nú í viðræðum um að setja upp óperuna, hugsanlega árið 2013.