Verðir sem starfa á Metropolitan listasafninu í New York hafa snúið dæminu við - í stað þess að gæta listaverka - sýna þeir verk sín. Sýningin, sem er samsýning 35 varða, hefur vakið mikla athygli í listalífi New York borgar enda margir varðanna einnig listamenn.

Fabian Berenbaum, listamaður og safnvörður segir verðina vinna mikilvægt starf, að gæta listarinnar og gestanna sem leggja leið sína í safnið. En stundum eigi þeir sínar stundir með verkum safnsins án afskipta annarra. Þá gaumgæfi þeir verkin og njóta listarinnar sjálfir.

Verk varðanna eru til sýnis í Gallery 25CPW og segir framkvæmdastjóri þess að sýningin hafi fengið gríðarlega athygli. Því hafi þurft að opna sýninguna á ný vegna fjölda óska þar um en hægt verður að skoða sýninguna á ný á morgun.