Cheryl Cole kom fram í sjónvarpi í Danmörku nýverið Reuters

Breska tónlistarkonan Cheryl Cole mun væntanlega óska formlega eftir skilnaði í vikunni en nokkrar vikur er síðan tilkynnt var um væntanlegan skilnað hennar og enska knattspyrnumannsins Ashley Cole vegna ítrekaðra hjúskaparbrota hans.

Heimild breska blaðsins Sunday Mirror hermir að Cheryl vilji ljúka skilnaðinum af sem fyrst og hún sækist ekki eftir því að fá aur frá eiginmanninum. Peningar hans hafi aldrei skipt hana máli og þeir geri það heldur ekki nú.

Á Cheryl að hafa átt fund með þekktum skilnaðarlögfræðingi, Fionu Shackleton, sem hefur meðal annars gætt hagsmuna Karls Bretaprins og   Paul McCartney.

Hins vegar herma aðrar heimildir að þrátt fyrir að söngkonan viti að hjónabandið sé á enda þá vilji hún bíða í sex mánuði með að ganga formlega frá skilnaðinum. Er það af virðingu við eiginmanninn sem mun væntanlega taka þátt í Heimsmeistaramótinu í knattspyrnu í sumar fyrir Englands hönd.