Íslendingar fjölmenna jafnan á Hróarskeldu. JOHN MCCONNICO

Uppselt er á tónlistarhátíðina á Hróarskeldu í ár, en í boði voru 75.000 miðar og seldust þeir síðustu upp þann 17. júní. Síðustu daga áður en uppselt varð seldust miðar á hátíðina hratt en það má, að sögn Tómasar Young tengiliðs Hróarskeldu á Íslandi,  rekja til þess, eins og fyrri ár, að tónleikadagskráin var gerð opinber s.l. sunnudag. Aðeins liðu fjórir dagar frá opinberun dagskrárinnar þar til uppselt varð á hátíðina.

Þó að allir miðar séu uppseldir sem veita aðgang að öllum dögum hátíðarinnar er enn möguleiki á að kaupa aðgang á staka daga hátíðarinnar. Miðana má kaupa hér: http://www.roskilde-festival.dk/uk/tickets/.

Tveimur hljómsveitum var bætt við nú á lokametrunum fyrir hátíðina en þær eru jafnframt þær síðustu sem tilkynntar eru á hátíðina að sögn Tómasar. Bandaríski tónlistarmaðurinn Gonjasufi spilar og þá mun Turboweekend frá Danmörku einnig koma fram.  

Patti Smith heiðrar minningu hinna látnu

Söngkonan Patti Smith mun koma að sérstökum viðburði á fimmtudeginum áður en tónleikar hefjast á svæðinu. Hún kemur fram með gítarleikara sínum Lenny Kay og munu þau ásamt hátíðargestum heiðra minningu þeirra sem létust árið 2000 á Pearl Jam tónleikunum.

„Að biðja Patti Smith um þetta var augljós kostur. Og okkur til mikillar gleði fengum við svar innan fárra klukkustunda - hún vildi endilega koma og þótti mikill heiður að vera beðin," sagði Rikke Öxner aðalbókari tónlistarhóps hátíðarinnar. Patti Smith kom síðast fram á Hróarskeldu árið 2001 á hátíðinni eftir að slysið hafði átt sér stað. Í tilkynningu segir að Patti hafi átt þátt í því að hátíðargestir hafi reist sig upp úr sorginni og tómleikanum með tónlist hennar á hljómleikunum árið 2001. „Hún hjálpaði öllum sem hlustuðu að finna sinn rétta anda og hátíðarhugrekkið," eins og Rikke Öxner orðar það. Viðburðurinn fer fram sem sér dagskrárliður og hefur engin áhrif á tónleika Patti Smith sem verða á laugardeginum í ár á appelsínugula sviðinu. 

Helstu hljómsveitir sem spila á Hróarskelduhátíðinni í ár eru: Gorillaz, Jack Johnson, Muse, Prince, Prodigy, Patti Smith, Them Crooked Vultures, Alice in Chains, Kasabian, LCD Soundsystem, Florence + The Machine, Motörhead, The National, Pavement, Sick of it all, Vampire Weekend, FM Belfast, Sólstafir, Biffy Clyro, Gallows, Julian Marley og margir fleiri.

Hljómsveitalistann í heild sinni má finna á heimasíðu Hróarskeldu.