Robert Pattinson leikur aðalhlutverkið í Twilight-myndunum. Reuters

Ungur maður fannst látinn í sal kvikmyndahúss í Wellington á Nýja-Sjálandi eftir að sýningu lauk á kvikmyndinni "The Twilight Saga: Eclipse".

Allir aðrir höfðu yfirgefið salinn þegar starfsmaður kvikmyndahússins tók eftir því að maðurinn sat enn í sæti sínu. Hann hélt að hann hefði sofnað en uppgötvaði að hann væri látinn þegar hann kannaði málið. Engir áverkar fundust á líkinu.

Krufning fer fram í dag þar sem reynt verður að komast að því hvað olli dauða mannsins að sögn rannsóknarlögreglunnar í Wellington en ekkert þykir benda til þess að maðurinn hafi verið myrtur.