Prince veit hvað hann syngur, eða hvað? Reuters

Bandaríski tónlistarmaðurinn Prince hefur enga trú á framtíð netsins ef marka má ummæli hans sem birtust í viðtali við breska slúðurblaðið The Mirror. „Netið er búið spil,“ segir Prince í viðtalinu, sem er það fyrsta sem hann hefur veitt í áratug.

„Hvers vegna ætti ég að gefa iTunes eða einhverjum öðrum nýju lögin mín. Þeir borga mér ekki fyrirfram og svo verða þeir reiðir þegar þeir fá þau ekki.“

Prince hyggst dreifa nýjustu breiðskífu sinni, sem nefnist 20Ten, ókeypis í gegnum ýmis dagblöð, m.a. Daily Mirror í Bretlandi og Daily Record í Skotlandi. 

Aðdáendur listamannsins geta nælt sér í eintak á laugardag með því að kaupa sér blað. Þeir munu hins vegar ekki geta nálgast efnið á netinu.

Prince hefur bannað YouTube og iTunes að nota tónlist eftir sig, og þá hefur hann lokað vefsíðunni sinni. Hann segir að netið sé orðið úrelt.

„Netið er eins og MTV,“ segir hann. „Eitt sinn var MTV aðalmálið og svo var stöðin orðin úr sér gengin. Hvað sem því líður, þá er ekkert gott við allar þessar tölvur og stafrænu tæki. Þau fylla bara hausinn á þér af tölum, og það getur ekki verið gott fyrir þig,“ segir Prince.

Popparinn hefur ekki tilkynnt með hvaða hætti hann muni gefa út nýju plötuna í Bandaríkjunum.