Japanska söngstjarnan Noriko Sakai.

Japanska söngstjarnan Noriko Sakai, sem á síðasta ári var dæmd í skilorðsbundið fangelsi fyrir fíkniefnamisferli, hefur gengið frá skilnaði við eiginmann sinn, Yuichi Takaso. Þau gengu í hjónaband árið 1998 og eiga ellefu ára gamlan son.

Sakai sem er 39 ára hefur verið mikið í umræðunni eftir að hún var dæmd í 18 mánaða skilorðsbundið fangelsi í nóvember síðastliðnum. Dómurinn kom til vegna örvandi vímuefna sem hún neytti. Takaso var jafnframt dæmdur í skilorðsbundið fangelsi í sama máli.

Í kjölfarið breytti Sakai um stefnu í lífinu og hóf fjarnám í hjúkrun við háskóla í Tókýó. „Ég er feginn að skilnaðurinn er genginn í gegn,“ segir Masahisa Aizawa, aðstoðarframkvæmdastjóri Sun Music en Sakai var á mála hjá fyrirtækinu. „Þetta fullvissar okkur um, að hún er ákveðin í að bæta ráð sitt.“

Sakai er þekkt um allan heim fyrir söng og leik sinn en helstu markaðssvæði hennar eru þó í Japan, Kína, Suður-Kóreu og Taívan.