Hip-hop tónlistarmaðurinn Wyclef Jean er í felum eftir að hafa fengið morðhótanir vegna framboðs síns til forsetaembættis Haíti.
AP fréttastofan hefur eftir Jean að hann hafi fengið fjölmargar viðvaranir, þ. á m. símhringingu þar sem honum hafi verið sagt að „koma sér burt frá Haíti.“
Forsetaframboð Wyclef Jean hefur valdið þó nokkrum titringi á eyjunum í karabíska hafinu auk þess sem fyrrum samstarfsfélagi Jean, Pras Michel, og leikarinn Sean Penn hafa gagnrýnt fyrirætlanir hans.
Kosningastjórn Haíti ætlaði að birta lista yfir löglega frambjóðendur í gær en frestaði því fram á föstudag.
Þá kemur í ljós hvort Wyclef Jean, sem er búsettur í Bandaríkjunum, megi bjóða sig fram til forseta Haíti.