Brjóstastækkun í happdrættisvinning
Gustavo Rojas ræðir við kjósendur. Reuters
Stjórnmálamaður nokkur í Venesúela hefur hleypt af stokkunum happdrætti til að fjármagna kosningabaráttu sína. Aðalvinningurinn er brjóstastækkunaraðgerð.
Stjórnmálamaðurinn, sem heitir Gustavo Rojas, vonast til að þetta óvenjulega happdrætti muni fleyta honum inn í þing Venesúela en kosningar fara fram 26. september. Miðinn kostar jafnvirði rúmra 700 króna.
„Í sumum happdrættum eru sjónvörp í verðlaun en við ákváðum að bjóða þetta," hefur Reutersfréttastofan eftir honum.
Lýtaaðgerðir eru algengar í Venesúela. Talið er að um 30 þúsund slíkar aðgerðir séu gerðar í landinu árlega og margir taka lán til að fjármagna þær.
Rojas,
sem er frambjóðandi Réttlætisflokksins, segist ekki hafa áhyggjur af því að femínistar gagnrýni happdrættið. „Þetta er fjáröflun og ekkert annað. Læknirinn mun gera aðgerðina, ekki ég," sagði hann.
