Börn á fæðingardeild. AP

Tveir læknar lentu í slagsmálum inni í fæðingarstofu í sjúkrahúsi á Sikiley á Ítalíu.

Kona, sem var að fæða barn inni í stofunni, fékk alvarlegar blæðingar og barnið fékk tvívegis hjartastopp eftir að það fæddist en stjórnendur sjúkrahússins fullyrða að ekki megi rekja það til áfloganna.

Ítalska fréttastofan ANSA segir, að áflogin hafi byrjað á fæðingardeild í borginni Messina þegar kona var í þann mund að fæða barn. Eiginmaður konunnar sagði lögreglu, að læknarnir tveir hafi farið að rífast og síðan hafi annar tekið hinn hálstaki og kastað honum í vegg. Hinn læknirinn barði í gluggarúðu sem brotnaði og maðurinn meiddist á hendinni. 

Sjúkrahúsið vék læknunum samstundis frá störfum.