Konur bragða á réttunum. Reuters

Óvenjuleg heimsmeistarakeppni fer fram árlega í afskekktu fjallaþorpi í Serbíu. Þar geta gestir fylgst með því hvernig eistu eru matreidd eftir öllum kúnstarinnar reglum - og jafnvel fengið að smakka hafi þeir lyst. 

„Þessi hátíð snýst um fjör, mat og hugrekki," segir  Ljubomir Erovic,  matreiðslumaður sem skipuleggur samkomuna í Ozrem og hefur m.a. skrifað bók um leyndardóma eistnasuðu. 

Eistu, sem raunar eru kölluð hvít nýru í Serbíu, eru talin innihalda mikið af karlhormóninu testósterón og hafi góð áhrif á karlmennskuna.

„Nautseistun eru best þegar þau eru soðin eins og gúllas," sagði  Zoltan Levai, sigurvegari síðasta árs, þar sem hann hrærði í potti á hlóðum. Í pottinum var grænmeti og stór eistu sem fengin voru úr nálægu sláturhúsi.

Á hátíðinni eru matreiddir réttir úr umræddum líffærum úr björnum, kameldýrum, strútum og jafnvel kengúru.  Meðal annars er hægt að fá eistnapítsu og aðra framandi rétti.  Séu menn viðkvæmir fyrir þessum réttum er einnig hægt að fá grillað lamba- og nautakjöt.

Gestir skola kræsingunum niður með miklu af víni og bjór og kæla sig í litlum fjallalæk sem rennur meðfram keppnissvæðinu.  

„Ég kom hingað í fyrra og ákvað að koma aftur, " sagði Anna Wexler frá Ísrael. Hún situr í dómnefndinni í ár. „Þetta var frábært. Við fengum eistnamússaka, gúllas, og margt annað.    .

MARKO DJURICA

Höggvið í eldinn. Reuters