Í miðju hlaupi stansaði Börkur til þess að smella af einni mynd. Leiðin er fremur strembin en gengið var upp í 2.500 metra hæð. mbl.is/Börkur Árnason.

Sex íslenskir hlaupagarpar lögðu leið sína til Frakklands til þess að taka þátt í Mont Blanc-fjallamaraþoninu. Heppnin var ekki með þátttakendum þar sem hlaupinu var aflýst vegna gríðarlegrar rigningar og aurskriðu.

Sleipt var í fjallinu og mikil leðja myndaðist vegna rigningarinnar en öðru eins úrhelli hafa menn ekki orðið vitni að á Íslandi.

„Hlaupinu var aflýst eftir að við hlupum 21 kílómetra. Hlaupið var bara stoppað og því varð ekkert af því,“ sagði Höskuldur Sigurvinsson en hann ásamt Berki Árnasyni ætlaði að hlaupa lengstu leiðina sem boðið er upp á, UTMB-maraþon sem er 166 kílómetrar. 

Íslendingarnir sem skráðu sig í hlaupið eru Arnfríður Kjartansdóttir, Helga Þóra Jónasdóttir, Daníel Smári Guðmundsson, Sigurður Kiernan og svo Höskuldur og Börkur, en nánar segir frá þessari þrekraun í Morgunblaðinu í dag.