„Ég snæddi kvöldverð með Bruce Willis í gærkvöldi. Ég vil að hann leiki ofurskúrk í Expendables 2. Hvað finnst ykkur?“ tísti leikarinn og leikstjórinn Sylvester Stallone á Tweeter í gær.

The Expendables hefur notið góðrar aðsóknar í kvikmyndahúsum vestanhafs (og er jafnframt í toppsæti íslenska Bíólistans) og náði m.a. þeim árangri að verða tekjuhæsta kvikmynd sem Stallone hefur leikið í, sé litið til frumsýningarhelgar í Bandaríkjunum. Því ættu peningar ekki að vera framhaldinu fyrirstaða.

Willis leikur hinn dularfulla Mr. Church í The Expendables sem setur hinum fórnanlegu fyrir hættulegt verkefni.

Þá velti Stallone því fyrir sér hverjir væru hættulegustu staðir heims hvað varðar sögusvið framhaldsins. Notendur Tweeter stungu þá m.a. upp á Suður-Afríku, Norður-Kóreu, Taílandi, Afganistan og Íran. Áhugasamir fylgist með tísti Stallone.