Ein eignaspjöll voru tilkynnt lögreglu í Vestmannaeyjum í vikunni en um var að ræða skemmdir að salernishurð á skemmtistaðnum Volcano. Þarna hafi einn gestanna orðið óhress með annan gest sem ruddist á undan inn á salerni og vildi sá sem sparkaði í hurðina láta vita af óánægju sinni með þessum hætti.

Þetta er meðal þess sem fram kemur í dagbók lögreglunnar í Vestmannaeyjum. Þrjú umferðaróhöpp voru tilkynnt lögreglu í vikunni en í öllum tilvikum var um minniháttar óhöpp að ræða og engin slys á fólki.