Francisco Varallo var fótboltaunnandi allt til dánardags. AFP

Síðasti eftirlifandi keppandinn úr úrslitaleiknum í fyrstu heimsmeistarakeppninni í knattspyrnu, Francisco Varallo, lést í gær 100 ára að aldri. Varallo keppti fyrir landslið Argentínu á móti Úrúgvæ í Montevideo árið 1930 og tapaði 4-2.

Á leiktíð sinni fyrir fótboltaklúbbinn Boca Juniors skoraði Varallo 194 mörk, og var það met ekki slegið innan liðsins fyrr en með núverandi framherja, Martin Palermo. Varallo hlaut fljótlega viðurnefnið  „Canoncito" eða „litla fallbyssan" enda var hann þekktur fyrir skotkraft.

Í tilefni 100 ára afmælis hans í fyrra tók Fifa viðtal við Varallo og sagði hann þar m.a. að tapið fyrir Úrúgvæ í heimsmeistarakeppninni 1930 hefðu verið mestu vonbrigðin á ferlinum. „Með fullri virðingu fyrir félögum mínum, þá vorum við ekki nógu djarfir," sagði fótboltakappinn fyrrverandi. „Það sem ég grét þennan dag. Meira að segja í dag þegar ég hugsa um það verð ég ennþá reiður."

Varallo lét af atvinnumennsku 30 ára að aldri vegna meiðsla og gerðist þá þjálfari.