Sagan af þýsku konunni sem var handtekin fyrir að reyna að fljúga heim með eiginmanninn látinn í þotu easyJet frá Englandi í apríl endaði vel. Því nú fimm mánuðum síðar er aska hans kominn heim til Berlínar og bíður á arinhillu frúarinnar eftir því að komast í vígða mold.

Gitta Jarant og dóttir hennar Anke Anusic neituðu því að hafa vitað að  Kurt Willi Jarant, 91 árs, væri látinn er þremenningarnir mættu í innritun í flug til Berlínar á flugvellinum Liverpool í apríl sl.

Þýska blaðið Bild hefur eftir dótturinni að Willi hefði verið ánægður með að vera kominn heim til Berlínar. „Þetta var allaf heimili hans," hefur Bild eftir  Anusic.

Starfsfólk á John Lennon flugvellinum í Liverpool hafði aðstoðað Willi, sem var með sólgleraugu, út úr leigubíl og komið honum fyrir í hjólastól. Hins vegar fylltust starfsmenn grunsemdum um að ekki væri allt með felldu og tóku púlsinn á honum. Í ljós kom að ekkert lífsmark var með manninum.

„Willi minn lést á flugvellinum. Hann varð allt í einu svo máttlaus og minnti á vaxbrúðu. Síðan urðu neglur á fingrum hans bláar," sagði ekkjan. „Hann var enn volgur þegar við vorum heima. Ég sver það."

Breska lögreglan var hins vegar ekki jafn sannfærð og taldi að ekkjan og dóttir hennar hafi ætlað að spara pening því afar kostnaðarsamt er að flytja lík milli landa. Mæðgurnar voru hins vegar látnar lausar gegn tryggingu og verður upplýst um málalok síðar í mánuðinum.