A Day in a Life er á plötunni Sgt. Peppers Lonely Hearts Club Band.

Lagið A Day in the Life er besta lagið sem Bítlarnir sendu frá sér að mati bandaríska tónlistarblaðsins Rolling Stone. Lagið var á plötunni Sgt. Peppers Lonely Hearts Club Band, sem kom út árið 1967 og þótti marka tímamót í útsetningu á popplögum. 

Lagið er að mestu eftir John Lennon en millikaflinn er eftir Paul McCartney og hann átti einnig hugmyndina að því að láta sinfóníuhljómsveit spila frá lægsta tóni á hljóðfærunum upp í þann hæsta og búa þannig til „hljómsveitarfullnægingu," eins og útsetjarinn George Martin kallaði það.

Næstbesta lagið er að mati Rolling Stone I Want to Hold Your Hand, sem kom út 1963, fyrsta Bítlalagið sem komst í efsta sæti bandaríska vinsældarlistans.  

Í þriðja sæti er lagið Strawberry Fields Forever, sem kom út á smáskífu ásamt Penny Lane árið 1967. Í fjórða sæti er Yesterday, sem kom út árið 1965, og í fimmta sæti er In My Life, sem var á plötunni Rubber Soal 1965.

Lag Georges Harrisons, Something, sem var á plötunni Abbey Road árið 1969, er í 6. sæti, Hey Jude, sem kom út á smáskífu 1968, er í 7. sæti, Let it Be, sem var á samnefndri breiðskífu Bítlanna 1970, þeirri síðustu, er í 8. sæti, Come Together, sem var á Abbey Road, er í 9. sæti og While My Guitar Gently Weeps, sem kom út á Hvíta albúminu 1968, er í 10. sæti.  

Vefur Rolling Stone