Tony Blair í viðtali við BBC í vikunni. Reuters

Tony Blair, fyrrverandi forsætisráðherra Bretlands, segist í endurminningum sínum, sem koma út í dag, hafa neytt áfengis daglega á tímabili til að slaka á og draga úr þeirri spennu, sem fylgdi embættinu.

Blair segir raunar að hægt væri að skrifa heila bók um tengsl áfengis og forsætisráðherra. Sjálfur segist hann hafa drukkið viskí eða gin og tónik fyrir kvöldmatinn og síðan eitt eða tvö glös á léttvíni, jafnvel hálfa flösku.

Hann segist telja, að honum hafi tekist að hafa stjórn á áfengisneyslu sinni en jafnframt gert sér grein fyrir því, að hann var farinn að „styðja sig" við áfengið.

„Eftir því sem tíminn líður verður þetta auðveldlega daglegur vani og líkaminn þarf á því að halda til að slaka á. Til að draga úr spennu. Til að örva. Til að gera leiðinlegt kvöld þolanlegt," skrifar Blair í bókinni The Journey.