Söngvari rokksveitarinnar Guns N' Roses, Axl Rose, segir hljómsveitina hafa átt að spila lengur en hún gerði á Reding- og Leeds-hátíðunum sl. helgi. Hljómsveitin hafi gert samkomulag um það við skipuleggjendur hátíðanna.

Rose tístir um þetta á Twitter og segir einhvern misskilning hafa valdið því að hljómsveitin fékk ekki að leika eins lengi og hún vildi, eða þá að skipuleggjendur hafi skipt um skoðun. Hljómsveitin lék á Leeds-hátíðinni 29. ágúst sl. og furðar Rose sig á ummælum skipuleggjanda hátíðarinnar, Melvin Benn, þess efnis að hljómsveitir haldi því oft fram að þeim hafi verið lofað að spila lengur, þegar komið sé að því að þær fari af sviði.

Guns N' Roses hóf leik klukkustund síðar en dagskrá gerði ráð fyrir á Reading-hátíðinni föstudaginn sl. og fékk að leika hálftíma lengur en til stóð skv. dagskrá.