Bono í léttri sveiflu í Vínarborg í vikunni. Reuters

Tony Blair, fyrrverandi forsætisráðherra Bretlands, telur Bono, öðru nafni Paul Hewson, söngvara írsku stórsveitarinnar U2, hafa það til að bera sem þurfi til að vera forsætisráðherra Bretlands. Blair lýsir þessari skoðun sinni í nýrri ævisögu sinni, A Journey.

„Hann hafði óumdeilanlega eðlislægar gáfur í stjórnmálin. Hann var afar fær í að vinna með fólki, mjög greindur og gat flutt innblásnar ræður. Ég vissi að hann gæti unnið með George [W. Bush],“ segir Blair í lauslegri þýðingu um félaga sinn Bono.

Írinn hefur á síðasta áratug skipað sér á bekk á meðal þekktustu aðgerðasinna heims í mannréttindamálum og segir Blair hann búa yfir óþrjótandi löngun til að bæta sig sem einstaklingur og baráttumaður. Þar fari maður sem sé aldrei fullsáttur við það sem hann hafi áorkað.

Blair lýsti yfir aðdáun sinni á söngvaranum í samtali við breska blaðið Times fyrr á árinu og skrifar í bók sinni að Bono gæti leikandi orðið þjóðhöfðingi. 

Bók Blairs hefur runnið út sem heitar lummur.