Kvikmyndahátíðin í Feneyjum hófst með pomp og prakt í gær en opnunarmynd hátíðarinnar var Black Swan, nýjasta kvikmynd Darrens Aronofskys og var þar um heimsfrumsýningu að ræða. Hátíðin stendur yfir í ellefu daga, lýkur 11. september, og verður margt girnilegt á boðstólum fyrir kvikmyndaunnendur, m.a. nýjustu verk leikstjóra á borð við Sofiu Coppola, Somewhere, Julian Schnabel, Miral, og Anh Hung Tran, Norwegian Wood. Seinasta frumsýning hátíðarinnar verður á kvikmynd Julie Taymor, The Tempest.

Í keppninni um bestu mynd hátíðarinnar eru m.a. kvikmyndir eftir myndlistarmanninn og nú leikstjórann Julian Schnabel, Miral, og Potiche eftir Francois Ozon en af myndum utan aðalkeppninnar má nefna A Letter To Elia eftir Martin Scorsese og Machete eftir Robert Rodriguez.