mbl.is/GSH

Skemmtigarðurinn Tívolí í Kaupmannahöfn hefur höfðað skaðabótamál á hendur dönskum klámmyndaframleiðenda fyrir að nota ímynd Tívolí í auglýsingar. Krefst skemmtigarðurinn milljónar danskra króna, jafnvirði um 20 milljóna íslenskra króna, í bætur. 

Málavextir eru raktir í blaðinu Berlingske Tidende í dag. Kvikmyndafélagið Innocent Pictures yfirtók fyrirtækið Sextv.dk, sem sendi út klámmyndir á nóttinni á sjónvarpsstöðinni Kanal  København. Nicolas Barbano, forstjóri kvikmyndafélagsins lét í kjölfarið gera kynningarmynd þar sem gamall slagari, Tivoli Night, hljómaði undir skuggamynd af bæ með stórum skemmtigarði. 

Forsvarsmönnum Tivoli A/S var ekki skemmt en Tívolí telur sig eiga höfundarrétt á orðinu. Sett var lögbann á notkun auglýsingarinnar og Tivoli AS höfðaði síðan mál og krafðist bóta fyrir að ímynd fyrirtækisins væri tengt við klám. Málið vannst í Sø- og Handelsretten og er nú komið fyrir hæstarétt Dana. 

Berlingske segir, að Nicolas Barbano viðurkenni fúslega að áhorfendur muni tengja skuggamyndina í auglýsingunni við Tívolí í Kaupmannahöfn en bera á móti því að hægt sé að eiga einkarétt á allri tengingu við Tívolí eða á orðinu tívolí.  

Þá bendir Barbano í viðtali við Information á tvískinnung Tívolí sem hafi á sínum tíma leyft að hlutar af kvikmyndunum Hopla på sengekanten og I løvens tegn væru teknir upp í Tívolí á áttunda áratug síðustu aldar.