Michael Caine mun setja sig í hasarstellingar í framhaldsmyndinni. Reuters

Breski leikarinn Michael Caine á nú í viðræðum um að leika í Journey 2: The Mysterious Island, sem er framhaldsmynd Journey to the Center of the Earth (Leyndardóma Snæfellsjökuls), sem kom út árið 2008 og skartaði Brendan Fraser og íslensku leikkonunni Anitu Briem í aðalhlutverki.

Brad Peyton mun leikstýra framhaldsmyndinni og er búist við að tökur hefjist í október nk. á Hawaii. Handritið byggir lauslega á sögu Jules Verne um Dularfullu eyjuna.

Hvorki Anita né Fraser munu endurtaka hlutverk sín í framhaldsmyndinni. Hins vegar mun Josh Hutcherson endurtaka leikinn.

Hasarmyndahetjan og glímukappinn Dwayne Johnson mun leika aðalhlutverkið á móti Hutcherson. Myndin fjallar um leit þeirra að afa persónu Hutcherson, en Caine mun leika afann.

Josh Hutcherson, Anita Briem og Brendan Fraser við frumsýningu Journey to the Center of the Earth fyrir rúmum tveimur árum. Reuters