Paul McCartney er þakklátur. Reuters

Kennedy listamiðstöðin í Washington hyggst heiðra Bítilinn Sir Paul McCartney í Hvíta húsinu í desember. Auk hans stendur til að heiðra bandaríska spjallþáttastjórnandan Opruh Winfrey, danshöfundinn Bill T. Jones, tónskáldið Jerry Harman og kántrístjörnuna Merle Haggard.

Þau munu fá afhent heiðursverðlaun við kvöldverð í boði bandarískra stjórnvalda 4. desember nk. Daginn eftir munu þau svo koma fram á hátíðardansleik.

Kennedy listamiðstöðin veitir árlega heiðursverðlaun til listafólks sem hefur sett mark sitt á bandarísk menningarlíf.

Stjórnarformaður stofnunarinnar, David M. Rubenstein, segir að verðlaunahafarnir hafi varið lífi sínu í að auðga menningarlífið og veita fólki innblástur, bæði í Bandaríkjunum og í heiminum.

Hann bætir því við að McCartney sé einn áhrifamesti og farsælasti lagahöfundur og tónlistarmaður allra tíma.

„Kennedy forseti var svo mikil táknmynd í okkar huga á sjöunda áratugnum og forsetatíð hans veitti svo mörgum mikinn innblástur. Það er því afar ánægjulegt fyrir þennan strák frá Liverpool að verða þessa heiðurs aðnjótandi,“ segir McCartney í yfirlýsingu.

Oprah Winfrey nýtur mikilla vinsælda. Reuters