Bresk stjórnvöld hafa ákveðið að friða gangbrautina utan við Abbey Road hljóðverið í norðurhluta Lundúna þar sem Bítlarnir tóku upp flestar plötur sína. Mynd af Bítlunum að ganga yfir gangbrautina er á umslagi plötunnar Abbey Road sem kom út árið 1969.

Þótt rúmir fjórir áratugir séu liðnir frá því þessi sögufræga mynd var tekin koma ferðamenn enn í hópum að gangbrautinni og láta taka af sér myndir að ganga yfir. 

Friðunin felur í sér, að gangbrautin er skilgreind sem hluti af breskum menningararfi og ekki má breyta henni. 

„Þetta hefur verið gott ár fyrir mig og Bítlana," sagði Paul McCartney. „Það er bara punkturinn yfir i-ið að búið er að friða  gangbrautina."