Skoski tónlistarmaðurinn Gerry Rafferty er látinn 63 ára að aldri, eftir langvinn veikindi. Hann er einkum kunnur fyrir lag sitt, Baker Street, sem kom út árið 1978.
Rafferty hóf feril sinn sem götusöngvari í Lundúnum. Hann stofnaði sveitina Stealers Wheel árið 1972 ásamt vini sínum, Joe Egan. Sveitin sendi m.a. frá sér lagið Stuck in the Middle with You, sem varð vinsælt árið 1972 og aftur árið 1992 þegar það var flutt í kvikmyndinni Reservoir Dogs.
Lagið Baker Street fór m.a. í 2. sætið á bandaríska vinsældarlistanum og 3. sætið á þeim breska.
Rafferty átti við áfengisvandamál að stríða og fékk lifrarsjúkdóm, að því er kemur fram á vef BBC.