Britney Spears nýtur enn mikilla vinsælda. Reuters

Nýjasti smellur poppstjörnunnar Britney Spears rauk beint í efsta sæti á Hot 100 lista Billboards í Bandaríkjunum. Þar með er hún aðeins annar listamaðurinn í 52 ára sögu listans sem hefur komið fleiri en einu lagi á toppinn fyrstu vikuna.

„Hold It Against Me“ trónir nú á toppi listans og árið 2009 var það lagið „3“ tyllti sér í toppsætið fyrstu vikuna.

Mariah Carey er eini listamaðurinn fyrir utan Spears sem hefur náð þessum árangri. Árið 1995 kom hún lögunum „Fantasy“ og „One Sweet Day“ beint á toppinn og árið 1997 var það lagið „Honey“ sem gerði slíkt hið sama.

Að sögn Nielsen SoundScan var lagið halað 411.000 sinnum niður gegn greiðslu. Ekki hafa jafn mörg eintök af lagi tónlistarkonu selst í einu fyrstu vikuna. Gamla metið átti Tayler Swift, en í febrúar sl. seldi hún 325.000 eintök af laginu „Today Was a Fairytale“.