Íslenska listakonan Hrafnhildur Arnardóttir hlýtur norrænu textílverðlaunin, The Nordic Award in Textiles, í ár. Þykja verk Hrafnhildar frumleg, en hún notar bæði alvöru hár og gervihár. Hún hlýtur jafnframt 4,5 milljónir kr. í verðlaun.
Hrafnhildur hefur búið og starfað í New York frá árinu 1994. Hafa listverk hennar verið sýnd í MoMa og þá hefur hún búið til hárskúlptúra fyrir listamenn á borð við Björk Guðmundsdóttur og Lady Gaga.
Stiftelsen Fokus Borås sjóðurinn veitir verðlaunin ár hvert, en hann var settur á laggirnar árið 2000. Verðlaunin verða afhent við hátíðlega athöfn í Borås í Svíþjóð 10 nóvember nk. Þá verða jafnframt til sýnis verk eftir Hrafnhildi í textílsafninu í Borås.