Drottningin sátt við Ræðu Konungs

Drottning Breta, Elísabet II, er sögð sátt við kyikmyndina The Kings Speech, Ræða konungs, sem segir af baráttu föður hennar Georgs VI við talgalla.

Á fréttavef BBC segir að drottningin hafi fengið einkasýningu á kvikmyndinni en hún segir myndina áhrifamikla. 

Handritshöfundur myndarinnar David Seidler sagði samþykki drottningar mikinn heiður. Hann hafi beðið með gerð myndarinnar í 30 ár að beiðni drottingarmóður þar sem hún hafi sagt að of erfitt væri að rifja upp þá atburði sem hún byggðist á.

Seidler sparaði ekki lýsingarorðin og sagði að nú þegar búið væri að skrifa handritið og gera myndina af væntumþykju, aðdáun og virðingu, væri ótrúlega og dásamlega mikils virði að fá viðurkenningu drottningar á henni. 

Kvikmyndin Ræða konungs var nýverið tilnefnd til tólf óskarsverðlauna. Hún hefur einnig verið tilnefnd til 14 Bafta verðlauna auk þess að vinna til verðlauna á Golden Globe í síðasta mánuði.

• 1 blogg um fréttina

Bloggað um fréttina

• Axel Jóhann Hallgrímsson: Fimm stjörnur, royal!