Gömul kona í Georgíu á fangelsisdóm yfir höfði sér eftir að hún rauf allt netsamband í nágrannalandinu Armeníu. Armenar voru internetlausir klukkustundum saman þann 28. mars vegna skemmda á ljósleiðara sem liggja til landsins frá Georgíu.

Talsmaður innanríkisráðuneytis Georgíu skýrði frá því í dag að 75 ára gömul kona hefði viðurkennt að hafa tekið ljósleiðarann í sundur í leit sinni að verðmætum kopar til að selja, í þorpinu Ksani. Hún áttaði sig ekki á því að hún hafði grafið sig niður á stærsta ljósleiðara landsins, sem tengdu austurhluta Georgíu, Armeníu og Aserbaídsjan við internetið.

Konan hefur verið ákærð fyrir athæfið en í ljósi aldurs var henni sleppt lausri og fær að dvelja heima hjá sér meðan á rannsókn og síðar réttarhöldum stendur.