Mynd af Jennu Lyons, forstjóra og aðalhönnuði fataframleiðandans J. Crew og syni hennar í nýjasta vörubæklingi fyrirtækisins hefur vakið mikla athygli og hörð viðbrögð í Bandaríkjunum. Ástæðan er sú að á myndinni er Lyons búin að naglalakka drenginn á tánum með skærbleikum lit, sem hún segir að sé uppáhaldslitur hans.

Íhaldsmönnum í Bandaríkjunum var gróflega misboðið vegna myndarinnar. Dr. Keith Ablow, sem starfar fyrir Fox-sjónvarpsstöðina, sagði að þetta væri dæmi um hvernig einkenni kynjanna væri á undanhaldi.

Erin Brown hjá Media Research Center sagði að myndin væri „óskammfeilinn áróður sem hampaði „transbörnum““. Sagði Brown jafnframt að þessi hvatning Lyons gæti gert drengnum erfitt fyrir í framtíðinni.

Viðbrögð við þessum viðbrögðum hafa sömuleiðis verið hörð. Í fjörugum umræðum hafa margir hafnað þeirri kenningu að með því að naglalakka hinn fimm ára gamla son Jenny Lyons væri verið að „gera hann samkynhneigðan“ á nokkurn hátt.

Dr. Jack Drescher, geðlæknir, tók í sama streng. „Ég get sagt með 100% vissu að það að móðir naglalakki tær sonar síns bleikar gerir hann ekki að kynskiptingi eða samkynhneigðan né nokkuð annað sem íhaldsmenn hafa áhyggur af,“ sagði Drescher.