Stuttmyndin „Jóna Guðrún“ eftir Valdísi Marselíu Þórðardóttur sigraði í Vídeósamkeppni Canon, Nýherja og Monitors á mbl.is sem lauk fyrir stuttu. Alls bárust 90 myndskeið í keppnina. „Common Problems in NoMA - The Printer“ eftir Sigurgeir Arinbjarnarson hafnaði í öðru sæti og „Benni BMX“ eftir Jóhannes Gauta Óttarsson í því þriðja. Að sögn Valdísar var myndbandið „Jóna Guðrún“, sem fjallar um einelti, skólaverkefni og var hún hvött til að senda það í keppnina.
Myndskeiðin sem bárust voru annars af öllum gerðum, snjóbrettamenn létu ljós sitt skína og einnig skeitarar og hjólakappar, sumir sendu inn stuttmyndir, aðrir hreyfimyndir eða tónlistarmyndbönd, til að mynda eð hljómsveitunum Sykri, Klassart og Kiriyama Family, náttúrulýsingar, parkour-myndbönd, körfuboltavídeó og svo má lengi telja. Vinningar í keppnini voru Canon vídeóvélar; Valdís hreppti Canon Legria HF106 HD vél, Sigurgeir Canon Legria FS36 og Jóhannes Canon FS306.
Myndskeiðin má skoða á Fólk-vef mbl.is.