Bréfið er loksins á leiðinni til viðtakandans 53 árum síðar Reuters

Ástarbréf sem sent var í pósti árið 1958 er loksins á leið til viðtakandans 53 árum síðar.

Bréfið var stílað á Clark C. Moore sem var nemandi við háskóla í Pennsylvaníu á þessum tíma en sendandinn var unnusta hans. Þau gengu í hjónaband þrátt fyrir að bréfið hafi ekki borist fyrr en nú.

Á vef BBC kemur fram að bréfið hafi fundist í póstherbergi háskólans fyrr í mánuðinum.

Erfiðlega gekk að hafa upp á viðtakandanum þar sem hann breytti nafni sínu fyrir löngu síðan í Muhammad Siddeeq. Vinur hans sá hins vegar frétt um bréfið í sjónvarpinu og lét vita hver réttmætur eigandi væri. Siddeeq, 74 ára, er mjög spenntur að sjá bréfið þó svo þau hjón séu skilin. Þau eiga fjögur börn saman.