Bíóaðsókn helgarinnar: Tinni Spielbergs enn á toppnum
Tinni, Skapti og Skafti. mbl.is
Nýjasta verk leikstjórans Stevens Spielbergs um ævintýri rannsóknarblaðamannsins Tinna og félaga hans Kolbeins kafteins er á toppnum, þriðju vikuna í röð, á lista yfir þær kvikmyndir sem mestar miðasölutekjur hlutust af yfir bíóhelgina.
Í öðru sæti er svo gamanmynd með hasarívafi, Tower Heist, með Ben Stiller og Eddie Murphy í aðalhlutverkum. Á hæla Tower Heist kemur íslenska teiknimyndin Þór en um 22 þúsund manns hafa séð hana.
Næst á lista er nýjasta verk leikarans og leikstjórans George Clooneys, The Ides of March. Gamanmyndin The Inbetweeners Movie, byggð á breskum gamanþáttum, dettur niður um tvö sæti, úr því þriðja í það fimmta. Íslenska kvikmyndin Borgríki er sú áttunda tekjuhæsta en um 15.000 manns hafa séð hana.
