Paul McCartney og eiginkona hans Nancy Shevell Reuters

Bítillinn Paul McCartney segist vera afar varkár hvað hann lætur út úr sér í síma eftir að sími hans var hleraður.

Hann tali aldrei lengi í síma og skilji aldrei eftir skilaboð í reiði. McCartney hefur samþykkt að ræða við lögreglu í tengslum við rannsókn á símahlerunum einkaspæjara á vegum slúðurblaða í Bretlandi. 

Í viðtali við Times segir McCartney að árið 2008 hafi hann farið að gæta sín á því hvað hann segði þar sem blöðin birtu fréttir um ýmislegt honum tengt sem ekki væri á vitorði annarra. Á þessum tíma voru hann og Heather Mills að skilja. Nefnir hann sem dæmi að frétt hafi birst um að hann væri að fara til Bahamas í leyfi og það var eitthvað sem hann hafði ekki nefnt við neinn. Það versta er að þú grunar alla í kringum þig um að leka upplýsingum.