Í dag eru 50 ár liðin frá einni frægustu áheyrnarprufu allra tíma; Decca-prufunni svokölluðu, en árið 1962 léku Bítlarnir nokkur lög fyrir starfsmenn Decca-hljómplötufyrirtækisins í von um að komast þar á samning.
Þeim var aftur á móti hafnað með þeim rökum að gítarhljómsveitir væru dottnar úr tísku.
Á þessum tíma var hljómsveitin skipuð þeim John Lennon, Paul McCartney, George Harrison og Pete Best, en sá síðastnefndi hætti síðan í hljómsveitinni og inn kom Ringo Starr, eins og frægt er orðið.
Starfsmaðurinn, sem viðhafði þessi fleygu orð, Dick Rowe að nafni, varð síðan þekktur sem „maðurinn sem hafnaði Bítlunum“. Hann fékk þó nokkra uppreisn æru þegar hann skrifaði undir samning við The Rolling Stones nokkru síðar, en það var enginn annar en George Harrison sem ráðlagði honum að gera það.