JC var annar aðalsöngvara N*Sync.

JC Chasez, sem gerði garðinn frægan með N*Sync bjargaði eins árs barni frá fljúgandi sólhlíf á nýársdag.

Móðir barnsins, fylgihlutahönnuðurinn Netali Nissim, hrósaði fyrrverandi N*Sync-söngvaranum í hástert fyrir skjóta hugsun þegar sólhlíf tókst á loft þegar þyrla lenti við Fontainebleau-hótelið í Miami og skaust í átt að litlu stúlkunni.

„Sólhlífin var nokkra sentímetra frá dóttur minni og hann stökk á milli þannig að hlífin skall á öxlinni á honum. Ég get ekki hugsað til þess hvað hefði gerst hefði hann ekki stokkið.“ Er hún poppstjörnunni afar þakklát.

Í samtali við People-tímaritið sagði hún svo frá: „Shirel er óhult, þökk sé honum. Ég sendi honum þakkarkveðjur frá mínum dýpstu hjartarótum. Ef hans hefði ekki notið við hefði dóttir mín slasast.“