Hverfur mademoiselle úr franskri tungu?

Bær á Bretagne í Frakklandi hefur bannað notkun orðsins „mademoiselle“, sem þýðir ungfrú, og því búa engar „mademoiselles“ í bænum Cesson-Sevigne lengur. Er þetta gert í kjölfar herferðar femínista sem hafa krafist þess að hætt verði að nota orðið fröken um ógiftar konur í Frakklandi. Veltir fréttamaður BBC því fyrir sér hvort orðið muni hverfa úr franskri tungu í kjölfarið.

Hafa bæjaryfirvöld bannað notkun orðsins í öllum skjölum bæjarins og gefa þá skýringu að ekki eigi að skilgreina konur eða karla eftir hjúskaparstöðu viðkomandi.

Því verða konur, óháð aldri og hjúskaparstöðu, titlaðar „madame“, líkt og allir karlmenn bera titilinn „monsieur“, þegar þær vaxa úr grasi.

Þjóðverjar sögðu skilið við ávarpið „fräulein“ árið 1972. Í enskumælandi löndum er „Miss“ óðum að hverfa og „Ms“ hefur tekið við af „Miss“ og „Mrs“.

En staðan er önnur í Frakklandi, líkt og á Spáni, þar sem notað er „senorita“, og Ítalíu, með „signorina“.