Eiffelturninn í París. Reuters

Franskar konur eru að gefa G-strenginn upp á bátinn, nærhaldið sem hefur kynt upp í mörgum karlmanninum. Í nýrri könnun, sem birt var í dag í tengslum við alþjóðlega undirfatasýningu sem hefst í næstu viku í París, segir að konurnar hafi fundið aðrar, mun þægilegri og klæðilegri leiðir að sama marki.

Franskar konur eru meðal þeirra kvenna heims sem eyða hvað mestu í undirföt. Í dag á aðeins um fjórðungur franskra kvenna í G-string en árið 2008 áttu um 30% þeirra slíkan grip.

Samkvæmt könnuninni telja 45% franskra kvenna að það geti verið kynþokkafullt að klæðast G-streng en 25% telja hann hallærislegan. Aðeins ein af hverjum fimm konum telur það í takt við tískuna að klæðast flíkinni.

Í stað G-strengsins eru því komnar svokallaðar „boxer“-nærbuxur og nærbuxur sem eru ósýnilegar og saumlausar.