Manni í Rússlandi, sem keypti nokkra rimlakassa til að nota í eldivið, brá í brún þegar hann uppgötvaði að í kössunum voru 79 Kalashnikov-rifflar.

Maðurinn keypti kassa sem notaðir höfðu verið undir rifflana. Hann reiknaði hins vegar ekki með öðru en að kassarnir væru tómir. Þegar hann kom heim á vörubílnum sínum sá maðurinn að hann var með vopnabúr í höndunum. Í kössunum voru einnig 253 skothylki og fleira. Hann hafði samband við lögreglu sem tók vopnin í sína vörslu.