Reuters

Óvænt hlé varð á tónleikum Fílaharmóníusveitar New York-borgar í vikunni þegar farsími eins tónleikagestsins tók upp á því að spila lag í miðri Sinfóníu númer 9 eftir Mahler.

Hljómsveitin var í lokakafla verksins, sem er leikinn mjög lágt, þegar iPhone eins gestsins, sem sat nálægt sviðinu, hóf að leika marimba. Hljómsveitarstjóranum, Alan Gilbert, var nóg boðið. Hann stöðvaði hljómsveitina, snéri sér við og hvessti augun á áhorfandann.  

„Þetta var hæsti tónninn í salnum," sagði Gilbert í sjónvarpsviðtali. „Eitthvað varð að gera."

Símaeigandinn, karlmaður á sjötugsaldri, var greinilega ekki búinn að læra almennilega hvernig ætti að þagga niður í símanum og því héldu þessir aukatónleikar áfram í dágóða stund.  „Hunskastu út," og „köstum honum út," heyrðist þá frá áhorfendum í salnum.

Blaðið New York Times hefur í dag eftir manninum, sem ekki er nafngreindur, að fyrirtækið sem hann vinnur hjá hafi látið hann hafa símann daginn áður. Hann segist hafa verið lengi að gera sér grein fyrir því að það var síminn hans sem truflaði tónleikana. Hann hafi ekki vitað að vekjaraklukkan í símanum var stillt á hringingu. 

„Fólk getur gert sér í hugarlund hvað það er hræðilegt að vita að þetta er manni að kenna," sagði maðurinn. „Það er hræðilegt, hræðilegt. Ég vona að fólk, sem var á tónleikunum og hljóðfæraleikararnir, geti fyrirgefið mér. Ég bið alla áheyrendur afsökunar."