Bond-skúrkar komu óorði á kjarnorku
Dr. No, James Bond og Honey Ryder á góðri stundu.
Forseti breska konunglega efnafræðifélagsins segir, að illu skúrkarnir í kvikmyndunum um njósnarann James Bond hafi komið óorði á kjarnorkuna.
Breska ríkisútvarpið BBC hefur eftir David Phillips, prófessor og forseta efnafræðifélagsins, að Dr. No, sem reisti sinn eigin kjarnakljúf, hafi orðið til þess að kjarnorka er litin hornauga. Segist Phillips vilja sjá endurreisn kjarnorkunnar.
Kvikmyndin Dr. No, sem frumsýnd var fyrir 50 árum, var sú fyrsta sem gerð var eftir bókum Ians Flemings um James Bond. Phillips segir, að vinsældir myndarinnar hafi komið þeirri tilfinningu inn hjá almenningi, að kjarnorka væri hættuleg, og auðkýfingar, haldnir mikilmennskubrjálæði og löngun í heimsyfirráð, gætu beitt henni til að ná markmiðum sínum fram.
Fleiri skúrkar í James Bond-myndum hafa reynt að komast yfir kjarnorku.
