Reuters

Hundar, kettir, kanínur og jafnvel skjaldbökur, fjölmenntu í kirkjur á Spáni í dag til þess að fá blessun á degi heilags Antons, verndara dýra. Mörg dýranna voru klædd í sitt fínasta púss í tilefni dagsins.

Eigendur dýra biðu í biðröð við kirkju heilags Antons í miðborg Madrídar og biðu þess að dýr þeirra yrðu ausin vígðu vatni. Margir Spánverjar trúa því að með þessu eigi dýr þeirra langt og gott líf framundan.

Carlos Romero er einn þeirra sem beið í biðröðinni með fimm ára gamla skjaldböku sem nefnist Paula. Romero missti aðra skjaldböku sem hann átti fyrir átta mánuðum síðan. Hann segist vonast til þess að með því að fá blessun muni Paula lifa lengi og veita honum félagsskap árum saman. Að sjálfsögðu hafi hann klætt Paulu í sín fínustu klæði, gula og rauða peysu en litirnir í spænska fánanum eru einmitt gulur og rauður. Á peysunni stóð heimsmeistarar og vísar það til heimsmeistaratitils Spánverja í knattspyrnu árið 2010.