Newt Gingrich Reuters

Newt Gingrich, sem stefnir að því að verða frambjóðandi repúblikana í komandi forsetakosningum í Bandaríkjunum, segist alveg vera búinn að gleyma frönskunni.

Hann viðurkenndi við blaðamann í dag að hann hefði kunnað frönsku í bernsku en þeir tímar væru að baki. Gingrich lét þessi ummæli falla er franskur blaðamaður spurði hann í dag um Afganistan en bað um leið afsökunar á hversu frönskuskotin enskan væri. „Þekkir þú John Kerry?“ spurði Gingrich blaðamanninn og vísaði til þess að Kerry, sem tapaði fyrir George Bush í forsetakosningunum árið 2004, talar frönsku og fékk heldur betur að heyra það í kosningabaráttunni að hann væri hliðhollur Frökkum. Á þessum tíma áttu Frakkar ekki upp á pallborðið hjá Bandaríkjamönnum vegna andstöðu þeirra við innrásina í Írak árið 2003.

Blaðamaðurinn gafst ekki upp og spurði Gingrich, sem bjó í nokkur ár í Orléans í Frakklandi í æsku þegar faðir hans gegndi herþjónustu þar, hvort hann talaði frönsku. „Nei ég talaði frönsku einu sinni fyrir löngu,“ svaraði Gingrich.