Fjórar manneskjur biðu bana í neðanjarðarlestakerfi New York-borgar á laugardaginn. Reuter

Fjórar manneskjur létust í neðanjarðarlestarkerfi New York-borgar á aðeins 24 klukkustundum síðastliðna helgi. Allar biðu þær bana á laugardaginn en lögregla borgarinnar telur dauðsföllin þó ekki tengd.

Fyrsta dauðsfallið varð um kl. 2 á laugardagsmorgun, að staðartíma, þegar maður á sjötugsaldri beið bana eftir að hafa fallið niður stiga á lestarstöð í Elmhurst í Queens.

Um sex klukkustundum seinna varð maður á þrítugsaldri fyrir lest þegar hann stóð milli lestarteinanna milli þriðju breiðgötu og Union Square á Manhattan.

Þriðja dauðsfallið var tilkynnt um eftirmiðdaginn þegar lestarstarfsmaður sá lík á lestarteinum við Nostrand Avenue neðanjarðarlestarstöðina í Brooklyn.

Á laugardagskvöld varð síðan vart við fjórða dauðsfallið þegar mannshöfuð fannst milli lestarstöðvarpalls og lestarvagns við lestarstöðina við sjöttu breiðgötu á Manhattan.