Nýfædd börn. Myndin er úr safni og tengist fréttinni ekki beint. Reuters

Afgönsk kona hefur eignast sex börn á sjúkrahúsi í borginni Mazar-e-Sharif. Þetta kom konunni í opna skjöldu því hún taldi sig aðeins eiga von á einu barni. Þá segist hún ekki hafa gengist undir frjósemisaðgerð.

Að sögn lækna var konan, sem er 24 ára gömul, innrituð á sjúkrahúsið í gær. Sama dag komu börnin í heiminn; þrír drengir og þrjár stúlkur. Þetta eru fyrstu börnin sem konan eignast, að því er segir í frétt á vef breska ríkisútvarpsins.

Þá segja læknar að það sé afar sjaldgæft að fólk eignist sex börn án þess að hafa gengist undir frjósemisaðgerð.

Læknarnir segja að börnunum líði vel þrátt fyrir að þau hafi öll verið lítil og létt. Það minnsta vó aðeins 700 grömm. Þá líður móðurinni vel en hún er hins vegar afar þreytt eftir átökin.

Breska ríkisútvarpið bendir á að tíðni barna- og mæðradauða í Afganistan sé afar há.